Tekst: Håvard Røgenes/Jonas Juul Hermansen
Strekninga til den nye sykkel- og gangvegen gjennom Kronstadtunnelen var opprinneleg ein 464 meter lang jernbanetunnel mellom Møllendal og Kronstad. Denne vart bygd i tidsrommet 1908-1913, og vart nytta til persontrafikk fram til 1965 som ein del av Bergensbanen. Etter dette vart tunnelen nytta til godstrafikk fram til bybaneutbygginga mellom Bergen sentrum og Fyllingsdalen starta.
Då tunnelen skulle byggast bestod det første stykket frå Møllendalssida av lausmassar som leire og mindre stein. Tunnelbygging i slike utfordrande grunnforhold krev stabiliserings- og sikringstiltak for at ikkje massane skal rase. Av denne grunn vart det konstruert ein 40 meter lang oppmura steinkvelv innover i lausmassane til ein møtte på fast fjell.
Starten av steinkvelvet er opparbeida med ein steinportal med tilhøyrande kjeglemurar, der portalen og delar av steinkvelvet er verneverdig og skal bevarast. Steinkvelvet er i underkant av 5 meter breitt og er difor for smalt for å romme sykkelveg og gangveg etter dagens standard. Ettersom delar av steinkvelvet er verneverdig og ikkje kan utvidast til dagens standard lagar Veidekke ei ny tunnelmunning ved sida av steinportalen. Den nye tunnelmunninga skal nyttast til gangveg og leiar inn til sykkelvegen der dei går saman til Kronstad. Under bygging av portalen vart det oppført kjeglemurar på begge sider av innløpet som òg skal bevarast. Den vestlegaste av kjeglemurane er i konflikt med den nye gangtunnelen og skal difor demonterast og reetablerast vest for den nye tunnelmunninga. Sykkelvegen vil gå vidare over jernbanebrua på Møllendalsida medan gangvegen går ned forbi Møllendal kapell.
Kronstadtunnelen og området rundt har fleire historiske element som skal bevarast gjennom prosjektet og vere med på å utsmykke den nye gang- og sykkelvegen frå Fyllingsdalen til Bergen sentrum.
Kjelder/bilete:
- Bybanen BT4: Kronstadsporet ved Møllendal Vedlegg Q-2
